«Uhi», շատ բազմիմաստ և հետաքրքիր անվանում է, որն ամեն մարդ մի կերպ է ընկալում։ Կպատմեք մի փոքր, որտեղի՞ց է ծնվել այդ մտահաղացումը։
Արմեն – «Ուհին» ծնվեց հենց մեր ստուդիայում աշխատանքի ժամանակ, երբ բառախաղ էինք խաղում՝ փորձելով ազատել մեր մտքի թռիչքը։ Աշակերտներիս ու Նարինեի հետ փորձեցինք արագ և կարճ ժամանակում ստեղծել հետաքրքիր բրենդի անվանում ու լոգո։ Ես առաջարկեցի «Ուհի»-ն, ստեղծեցի լոգոն և պահեցի մոտ 3-4 տարի՝ մինչև բրենդի հիմնադրումը։ Սկզբում դա պարզապես բառախաղի արդյունք էր, ոչ թե բրենդ ստեղծելու նպատակ։
Նարինե – Անվանումը ամբողջությամբ Արմենն է ընտրել։ Վերցրել ենք «հայուհի» բառի «ուհի» վերջածանցը․ քանի որ մեր նախորդ բրենդերը արտասահմանյան շուկայի համար էին, որոշեցինք, որ նոր բրենդը պիտի ծառայի հայուհիներին։ «Հայուհի» անվանումը շատ պարզ կլիներ, իսկ «Ուհի»-ն մի քիչ միստիկ ու խորիմաստ է, առաջացնում է տարատեսակ ընկալումներ։
Uhi զարդերը տարբերվող և օրիգինալ կոնցեպտ ունեն։ Գիտենք, որ Ձեր ամուսինն է զարդերի հեղինակը։ Որո՞նք են նրա հիմնական ոգեշնչման աղբյուրները։
Արմեն – Նորաձևությունը ոչ միայն ստեղծագործելու, այլև թրենդերին հետևելու գաղափարախոսություն է։ Եթե ուզում ես լինել նորաձև՝ պետք է հետևես նորաձևությանը։ Մենք «Ուհի»-ում ուշադրություն ենք դարձնում ամեն մանրուքի՝ գույների, ձևերի, գաղափարների։
Նարինե – Սա բնական շարունակությունն է։ «Ուհի»-ն մեծ ճանաչում ունի, ու սխալ կլիներ կանգ առնել միայն զարդերի վրա։ Հուսով եմ ապագայում կունենանք նաև հագուստի և այլ աքսեսուարների գիծ։