Ինչպե՞ս ծնվեց բրենդի գաղափարը, և ի՞նչը Ձեզ դրդեց սկսել այս ճանապարհը։
- Շոկոլադի հանդեպ սերս եղել է շատ վաղուց։ Ինձ միշտ գրավել է այն միտքը, որ փոքրիկ շոկոլադե կոնֆետը մարդկանց մոտ կարող է ժպիտ առաջացնել և հիշարժան դարձնել կարևոր պահերը։
Սկզբում պատրաստում էի ընկերներիս, ընտանիքիս համար, հետո որոշեցի ստեղծել մի բրենդ, որը կարտացոլի իմ զգացմունքները։ Այդպես ծնվեց «Kristelle des Chocolats»-ը։
Ինձ համար կարևոր էր ոչ միայն ստեղծագործելը, այլ նաև սեփական բրենդը զարգացնելու և ցույց տալու հնարավորությունը, որ Հայաստանում նույնպես կարելի է ունենալ միջազգային մակարդակի շոկոլադե բրենդ։
Ես տասնյոթ տարի աշխատել եմ Երևանի պետական համալսարանում, ու շատերին, իրոք, զարմացնում է, թե ինչպես կարող էի այդքան տարբեր բնագավառներից անցում կատարել։ Բայց ես, երևի, ավելի շատ ստեղծագործ մարդ եմ, միշտ սիրել եմ ձեռքի աշխատանքը։
Եվ եկավ մի պահ, երբ արդեն զբաղվում էի շոկոլադներով ու հասկացա, որ դա ինձ շատ ավելի հոգեհարազատ է։ Այդ ժամանակ էլ որոշեցի թողնել հիմնական աշխատանքս և ամբողջությամբ զբաղվել արդեն իմ «Kristelle des Chocolats»-ով։
Ձեր շոկոլադները հաճախ կարող են լինել նվերներ հատուկ պահերի համար։ Ինչպե՞ս եք ապահովում յուրաքանչյուր պատվերի անհատականությունը և ստեղծում դրա պատմությունը։
- Յուրաքանչյուր պատվեր անհատական պատմություն է, և մեզ համար կարևոր է, որ նվերը լինի ոչ միայն համեղ, այլև գեղեցիկ և փոխանցի այն զգացումները, որոնք կապված են տվյալ առիթի հետ։
Եվ երբ նվեր ստացողը բացում է տուփը, կարևոր է, որ զգա, թե որքան ուշադրություն և հոգատարություն է ներդրված հենց իր համար։
Ո՞րն է ամենաբարդ փուլը շոկոլադի ստեղծման գործընթացում։
- Շոկոլադը շատ նուրբ նյութ է, և յուրաքանչյուր մանրուք՝ լինի դա խոնավությունը, ջերմաստիճանի տատանումը, թե համերի համադրությունը, ազդում է վերջնական արդյունքի վրա։
Եվ ինձ համար կարևոր է, որ յուրաքանչյուր կոնֆետ լինի ոչ միայն համեղ, այլ նաև համապատասխանի այն բարձրակարգ ստանդարտներին, որոնք ես սահմանել եմ բրենդի համար։
