Makhmur-ն իր մեկնարկից՝ 2021 թվականից, արագ սիրվեց հայկական շուկայում։ Ինչպիսի՞ ռազմավարություններ եք կիրառել բրենդի` շուկայում ճիշտ դիրքավորման և առաջխաղացման համար։
Սկզբում մենք սիրվեցինք, հետո միայն սկսեցինք մտածել ռազմավարությունների մասին, քանի որ ես ինքս էլ չէի պատկերացնում, թե «Մախմուրը» ինչ է դառնալու, ինչպես է ընդունվելու և արդյո՞ք դրա կարիքը կա։ Սիրվելուց հետո, հասկանալով այդ ամենը, արդեն սկսեցինք մշակել ոչ թե ռազմավարություններ, այլ գործելաոճեր, աշխատանքային մեթոդներ ու տեխնիկաներ՝ հասկանալու համար, թե ինչ ուղղությամբ ենք գնալու։ Օրինակ՝ թողարկում էինք հավաքածուներ՝ ձմեռային, գարնանային, մասնակցում որոշ ցուցահանդեսների, որոնք այժմ մեզ այնքան էլ անհրաժեշտ չեն, բայց այն ժամանակ ճանաչելիություն էին բերում։ Եվ, իհարկե, բավականին ակտիվ էինք սոցիալական հարթակներում․ որպես նոր և շատ յուրահատուկ արտադրանք ցույց էինք տալիս, թե որքան անհրաժեշտ աքսեսուար է մեր պայուսակը յուրաքանչյուր կնոջ համար։
Որո՞նք են Makhmur-ի երկարաժամկետ նպատակները։ Որտե՞ղ եք տեսնում բրենդը առաջիկա հինգ տարվա ընթացքում՝ թե՛ շուկայական ընդլայնման, թե՛ նոր ապրանքատեսակների առումով։
Վերջերս հանդիպեցի մի լավ խոսքի․ «Եթե քո երազանքները քեզ չեն վախեցնում, ուրեմն դրանք փոքր են»։ Եվ այսօր ուզում եմ խոսել մի բանի մասին, որը իսկապես վախեցնում է ինձ։ «Մախմուրը» որևէ ազգային զարդանախշ կամ տարր իր վիզուալ տեսքի մեջ չունի, այսինքն՝ սահմանափակումներ չունի։ Ես միշտ ասում եմ, որ այն ցանկացած կնոջ համար է։ Ուրեմն ինչու չնվաճել աշխարհը, ինչու չգնալ այդ ուղղությամբ՝ փնտրելով, փորձելով։ Վերջերս մասնակցեցինք Ֆլորենցիայում մի հայտնի ցուցահանդեսի և հասկացանք, որ Եվրոպայում ցուցահանդեսները մշակույթի մաս են դարձել։ Հրավեր ունենք Միլանից և շարունակելու ենք մասնակցել տարբեր ցուցահանդեսների, որտեղ այցելում են մարդիկ աշխարհի տարբեր կետերից։ Շատ լավ եմ պատկերացնում «Մախմուրը» ԱՄԷ-ում։ Այն յուրաքանչյուր կնոջ համար է, և մենք մեր ճիշտ, «մախմուրյան» ճանապարհով դուրս կգանք միջազգային շուկա։
Ես մեծ պլաններ ունեմ․ վախեցնող նպատակները միշտ ուղեկցում են ինձ։ Վերջերս ստեղծեցինք շրթներկի փոքր տուփեր, քանի որ կանայք շատ են սիրում իրենց հետ նման բան ունենալ։ Դա նորություն էր։ Բացի այդ, ունեմ բազմաթիվ գաղափարներ․ ասեղնագործությունը շատ հնարավորություններ է տալիս առաջ գնալու և ճյուղավորվելու։ Անպայման կունենանք գեղեցիկ նոր աքսեսուարներ։ Այս պահին ունեմ մանկական ձեռագործ հագուստ ստեղծելու նպատակ, որը, կարծում եմ, մոտ ապագայում կիրականանա։ Այն կլինի այլ անվան տակ, բայց «Մախմուրի» գաղափարախոսության ներքո։