Siana Collection-ը նորաձևությունը դիտարկում է որպես ինքնարտահայտման միջոց։ Ինչպե՞ս եք Դուք սահմանում «ոճ» հասկացությունը և ինչպես է այդ մոտեցումը արտացոլվում Ձեր հավաքածուներում։
- Siana-ն իսկապես ինքնարտահայտման հզոր միջոց է։ Մենք մեր հավաքածուներում ձգտում ենք ստեղծել հագուստ, որը միաժամանակ և՛ հարմարավետ է, և՛ ոճային։ Մեզ համար առաջնայինը այս երկուսի համադրումն է։ Երբ մարդը հագնված է հարմարավետ և միևնույն ժամանակ գեղեցիկ ու ինքնատիպ, այն արդեն իսկ դառնում է ոճ։ Մենք հետևում ենք թրենդներին, բայց դրանք ուղղակի կրկնելու փոխարեն՝ փորձում ենք դրանց հիման վրա ձևավորել Siana-ի ուրույն և ճանաչելի ոճը։
Ինչպե՞ս կգնահատեք Ձեր Instagram-յան էջի «Where and What...» ձևաչափի ազդեցությունը բիզնեսի ճանաչելիության վրա։ Հետևում ու արդյո՞ք կիրառում եք սոցիալական հարթակներում անընդհատ փոփոխվող թրենդները։
- Թրենդներին չհետևելն այսօր պարզապես անհնար է, հատկապես Instagram-ի նման հարթակներում, որոնք ունեն իրենց ալգորիթմներն ու օրենքները։ Բայց մենք միշտ փորձում ենք պահպանել մեր ինքնատիպությունը։ «Where and What...» ձևաչափը շատ սիրված է մեր հետևորդների կողմից։ Դրա միջոցով ոչ միայն ներկայացնում ենք մեր հագուստները, այլ նաև ոճավորման հնարավորություններ՝ ներգրավելով հյուրեր, որոնք սիրում են նորաձևությունը և ոգեշնչում մեր լսարանին։ Այդպես մենք պահպանում ենք մեր կապը հաճախորդների հետ՝ ինտերակտիվ ու բնական ձևով։
Ինչպիսի՞ նոր միտումներ կան 2025 թվականի հագուստի շուկայում, և ինչպես եք դրանք ադապտացնում Ձեր հավաքածուներում։
- 2025 թվականին շարունակվում են թրենդային մնալ ընդգծված իրանով հագուստները և լայն ուսերը։ Մենք նախատեսում ենք մեր աշնան և ձմեռային հավաքածուներում ներառել նոր բրդյա հագուստներ, որոնք անցյալ տարի բացակայում էին մեր տեսականուց։ Այդ հագուստները ոչ միայն նորաձև կլինեն, այլև կտրվեն բարձրորակ նյութերից՝ համապատասխանելով միջազգային առաջատար բրենդների միտումներին։ Ի դեպ, երբ թողարկեցինք մեր լյոնի հավաքածուն, սպասելիքները շատ ավելի համեստ էին, բայց այն արագ սիրվեց։ Այդ արձագանքի համար անկեղծորեն շնորհակալ ենք մեր հաճախորդներին։
Նկարագրեք հայ հաճախորդներին. արդյո՞ք նրանք պահանջկոտ են։
- Հայ հաճախորդներն իսկապես ուշադիր են։ Թեև կան տարբեր տեսակներ՝ ոմանց համար կարող է առաջնային չլինել կտորի կազմը, սակայն մեր հիմնական լսարանը մեծ ուշադրություն է դարձնում որակին։ Նրանք գնահատում են լավ կտորը, մանրուքների մշակվածությունը և ընդհանուր կերպարի ներդաշնակությունը։ Այսինքն՝ մեր հաճախորդը հաճախ գալիս է ոչ միայն հագուստ գնելու, այլ նաև վստահելու՝ թե ոճի, թե որակի առումով։