Արտ Լանչի ցանցն այսօր գործում է ոչ միայն Հայաստանում, այլև ՌԴ-ում, Ղազախստանում, ԱՄՆ-ում և Ուկրաինայում: Ինչպե՞ս ստացվեց հաջողությամբ մուտք գործել միջազգային շուկա՝ հաշվի առնելով յուրաքանչյուր երկրի խոհանոցի առանձնահատկությունները։ Ի՞նչ սկզբունքներ եք կիրառում՝ անձնակազմ ընտրելիս ի՞նչ դեր ունի արտերկրյա մասնաճյուղերի զարգացումն ընկերության բիզնես ռազմավարության մեջ:
- Նորից և նորից հաղթահարելով դժվարությունները, երբեմն փակվելով, երբեմն կրկին բացվելով, փորձ ձեռք բերելով և, եթե առաջին անգամ չի ստացվել, նորից փորձելով։ Համառ պայքարով և մեծ նվիրումով, այժմ, փառք Աստծո, ամեն ինչ լավ է։
Մենք ավելի հակված ենք «разведка боем» գաղափարախոսությանը։ Այսինքն՝ միանգամից մտնում ենք շուկա՝ առանց երկար ուսումնասիրությունների։ Մենք ռիսկի ենք գնում՝ փորձարկելու մեր բրենդը արտերկրում, հասկանալու խնդիրներն ու մարտահրավերները, որպեսզի ընթացքի մեջ լուծենք դրանք։ Նախընտրում ենք արագ մուտք գործել շուկա, քան երկար ժամանակ ծախսել ուսումնասիրությունների վրա։
Արտ Լանչը նաև սոցիալապես պատասխանատու ընկերություն է՝ ի դեմս իր սոցիալական կոնցեպտով կաֆետերիաների: Ո՞րն է եղել այդ մոդելի ստեղծման գլխավոր շարժառիթը և ի՞նչ դեր է այն զբաղեցնում Ձեր բիզնեսում: Ինչպե՞ս է այն աջակցում տարբեր սոցիալական խմբերին՝ տարեցների գլխավորությամբ:
- Դա եղել է մեր գաղափարախոսությունը ի սկզբանե․ մեր նպատակը ոչ միայն գումար աշխատելն է, այլ նաև ստանձնել որոշակի սոցիալական պատասխանատվություն։ Մեր ընկերությունում սոցիալական պատասխանատվության դերը գնալով մեծանում է՝ հաշվի առնելով մեր հնարավորությունները։
Ձեր բրենդի հիմնարար սկզբունքներից է թարմ և մատչելի սնունդի մատուցումը: Ի՞նչ քայլեր եք ձեռնարկում՝ որակական չափանիշները պահպանելու և հաճախորդների բավարարվածությունը բարձր մակարդակի վրա պահելու հարցում:
- Ցանցային դառնալու հիմնական սկզբունքներից մեկը բարձրակարգ մասնագետներ ունենալն է։ Դրա համար կարևոր է ունենալ վերահսկողության բաժին, սանիտարա-հիգիենիկ բաժին և աուդիտի բաժին։ Այս բոլոր բաժինները ուղղված են ապահովելու մեր արտադրանքի և ծառայությունների բարձր որակը։