Ի՞նչ սկզբունքներով եք առաջնորդվում Amanoo-ի նախագծերում և ի՞նչ ստանդարտների եք հետևում՝ բնակիչների համար կյանքի բարձր որակ և հարմարավետություն ապահովելու համար:
- Մեր առաջին առաքելությունը չկրկնվելն է՝ լինել օրիգինալ և տարբերվող։ Մեր նպատակն է առաջարկել մի միջավայր ապագա բնակիչների համար, որտեղ նրանք կարող են ոչ միայն բնակվել, այլև վերաբերվել թաղամասին որպես հանգստի գոտու՝ իրենց ժամանցն անցկացնելով մեր ընդհանուր օգտագործման բակերում։ Կարծում եմ, այս արդեն իսկ ստեղծված էկո միջավայրը կարող է փոխել և արդեն փոխում է բնակության վերաբերյալ մեր բոլոր ավանդական պատկերացումները։
Ինչպե՞ս եք գնահատում լանդշաֆտային դիզայնի դերը ձեր նախագծերում, որոնց մեջ 75% տարածքը զբաղեցնում են կանաչ գոտիները:
- Եթե հաշվի առնենք, որ մեր կառուցապատման տոկոսը կազմում է ընդամենը 18 տոկոս, կարող ենք ասել, որ մնացած ամբողջ հատվածը կազմված է կանաչ գոտիներից, որոնց մենք հատուկ ուշադրություն ենք դարձնում։ Կանաչ գոտիները պետք է լինեն ոչ միայն ծառածածկ և գեղեցիկ լուծումներով, այլև ներառեն ջրային գոտիներ, ինչը մեզ համար առաջնահերթություն է։ Այս համադրությունն է, որ ստեղծում է մեր նախագծի յուրահատկությունը։
Իրականում, ծառատունկն ունի ոչ միայն այն դրական կողմը, որ մենք էականորեն կանաչապատում ենք Երևանը, այլև ծառահատման ենթակա ծառերին երկրորդ կյանք տալու գաղափարը։ Մեր մարզերում մենք հանդիպում ենք բազմաթիվ ծառերի, որոնք սեփականատերերին խանգարում էին կամ շինարարության ճանապարհին էին։ Մենք մեծ սիրով և ռեսուրսներ տրամադրելով տեղափոխում ենք այդ ծառերը, նոր կյանք ապահովելով դրանց համար Երևանում։ Այդպիսով, մենք կանխում ենք նրանց ծառահատումը և օգտագործումը փայտանյութի համար՝ փոխարենը դարձնելով դրանք քաղաքի կենսունակության մաս։
Հաշվի առնելով, որ արդեն երկրորդ նախագիծն եք մեկնարկել, ինչո՞ւմն է առաջինի ու երկրորդի միջև տարբերությունը, ինչի՞ վրա է դրված երկրորդ նախագծի շեշտը, և արդյո՞ք առաջինի կյանքի կոչման ընթացքում եղել են ինչ-որ ասպեկտներ, որոնք որոշել եք փոփոխել երկրորդն իրականացնելիս, կամ, գուցե, ինչ-որ կետերի վրա ավելի շատ ուշադրություն դարձնել:
- Ասեմ, որ թաղամասի ընդհանուր համայնապատկերը դեռ որոշվել է 2018 թվականին, և մենք յուրաքանչյուր 2 տարի մեկ ներկայացնում ենք թաղամասի նախագծային տեսքը, թե ինչպիսին պետք է լինի։ Նախագծերը միմյանց հետ կապված են և լրացնող։ Օրինակ՝ առաջին հատվածում ներկայացրել ենք 4 կամպուսային փոքր կառույցներ, որտեղ կա 50 բնակարան, իսկ երկրորդ հատվածում մեկ կառույց է՝ բաղկացած 70 բնակարանից, և այս նախագծերը միմյանց լրացնելով ստեղծում են ճարտարապետական միասնություն։
Բիոմետրիկ ճարտարապետական ուղղությունը օգտագործելով, կարողացել ենք կապել նախագիծը բնության հետ և ընդգծել դրա բնորոշ հատկանիշները։ Ասեմ նաև, որ նախագծի ոգեշնչման աղբյուրը հայկական բնաշխարհն է, և կառույցը հիշեցնում է հայկական լեռնաշղթան, իսկ ջրվեժները բնականաբար՝ հայկական ջրվեժներն են։